Усны тухай болон усны хэрэглээ, ус бохирдлын талаар тодорхой мэдээллийг хавсралтаар хүргэж байна.

Усны бохирдол гэдэг нь зөвхөн нүдэнд харагдах булингарталт биш юм. Усны бохирдолд:

Ууссан хүчилтөрөгч бага

Хүчил, шүлтийн хэмжээ алдагдах

Булингардалтай байх зэрэг багтана

Хот, суурин газруудын усны хангамжийн тухай мэдэх үү?

Хэрэв хүн олноор амьдардаг хотын айл бүр, байгууллага болгон өөртөө зориулан худаг гаргаад ч юм уу, эсвэл хэрэгцээт усаа голоос зөөдөгсөн бол ямар их хүндрэлтэй байхыг төсөөлөхөд ч бэрх юм. Ийм хүндрэлгүй байхын тулд томоохон суурин, хотуудын ус хангамжийг хариуцсан Ус Сувгийн Удирдах Газар гэдэг мэргэжлийн байгууллага үйл ажиллагаа явуулдаг. Энэ байгууллага нь хотын оршин суугчдыг унд, хэрэглээний цэвэр усаар хангаж, хэрэглээнээс гарсан бохир усыг татан авч цэвэрлээд байгальд эргүүлэн буцаах үндсэн үүрэгтэй.

Манай орон өргөн дэлгэр нутагтайн дээр усны нөөц жигд бус тархалттай, 1 ам.км талбайд 22 мянган шоо метр ус ноогддог нь дэлхийн дунджаас үлэмж доогуур юм. Нийт нутаг дэвсгэрийн 2/3 хувийг тал хээр, говийн гандуу, хуурай бүс нутагт бүх усны нөөцийн 36 хувь нь ноогдож байхад тэнд мал сүргийн 60 шахам хувь нь бэлчээрлэдэг байна. Нутгийн хойд хэсэгт усны нөөц хүрэлцээтэй, харин говь хээрийн бүсэд гадаргын усны сүлжээгүй, дийлэнх хэрэглээг газрын доорхи усаар хангаж байгаа ба энэ бүс нь эх газрын давсжилтын бүсэд оршдогоос ихэнх тохиолдолд ус нь эрдэсжилт, хатуулаг ихтэйгээс ашиглалтанд тэр бүр тохирдоггүй.

Ус хаана байна тэнд амьдрал байдаг нь тодорхой. Цэвэр ус нь хоол хүнс, ахуйн хэрэглээ, аж үйлдвэр болон хөдөө аж ахуйд хэрэглэгддэг. Далай тэнгис, нуур, томоохон гол мөрнийг хүмүүс тээврийн зам болгон ашигладаг. Мөн ус нь адал явдалт аялал болон эрсдэл бүхий спорт сонирхогчид болон жирийн аялагч жуулчдыг даллан дуудах талбар болдог. Загас нь хэдэн мянган жилийн тэртээгээс хүмүүсийн үнэт хоол хүнс болсоор ирсэн. Мөн тэнгисийн давалгаа болон түрлэгийг ашиглан эрчим хүч үйлдвэрлэхээс гадна далайн ёроолоос газрын тос болон бусад эрдэс  баялаг олборлодог.